வைகோ, சீமான் இருவரில் சிறந்தவர் யார் ஒரு அலசல்

கடந்த சில வாரங்களாக நமது மக்களிடையே நிலவும் ஒரு கருத்து என்னவென்றால் ஏன் சீமான் திருமாவளவன், வை.கோ போன்றோருடன் இணைந்து செயல்படவில்லை என்பது தான். சீமான் யாருடன் இணைந்து தனது அரசியலை கொண்டு நடத்த போகின்றார் என்பது அவரது சொந்த விடயம்.

சீமான் ஆரம்பத்தில் இருந்தே தனியாக போராட வேண்டும் என்ற கொள்கை உடையவர். அதன் வழி நடந்து வருகின்றார். ஆனால் எம்மை பொறுத்தவரை இந்தியாவில் வாழும் எந்த ஒரு தமிழ் தலைவர்களும் எமது ஈழ தேசத்திற்காக உயிரை விட போவதில்லை.அத்துடன்  தமது சொந்த நலன்களை இழக்கப்போவதில்லை. உண்மைத் தொண்டனாக இருக்கும் கட்சி நலன் விரும்பிகளும், அடிமைத் தொண்டனுமே எமது உறவுகளுக்காக உயிரை கொடுப்பதும் தீ குளிப்பதும் நடந்து கொண்டு இருக்கும்.

இதில் வை கோ  பற்றி நாம் மிகவும் தெளிவாக புரிந்து கொள்ள கூடியவர்களாக இருக்க வேண்டும். எந்த ஒரு இந்திய தமிழ் தலைவர்களால் எமக்கு ஈழம் கிடைத்துவிட போவதில்லை என்றாலும் அரசியல் ரீதியாக சில தலைவர்களின் உதவி எமக்கு தேவை. அந்த வரிசையில் எமது சுதந்திர போராட்டத்தை ஓரளவு புரிந்த தன்மை கொண்டவர்களாக வை.கோ வையும் சீமானையும் இன்னும் பழநெடுமாறன் ஆகியவர்களையும்  நோக்க முடியும். ஆனாலும் கடந்த காலங்களில் ஏற்பட்ட அரசியல் ரீதியான பின்னடைவுகளும் வை கோ வின் அரசியல் கட்சி மாற்றங்களும் எமக்கு ஓர் வைக்கோ மீதான ஒரு நம்பிக்கையை தளர்த்தி இருப்பது உண்மையான விடயம். ஆனாலும் வை கோவை ஈழ நலன்களில் அக்கறை இல்லாதவர் என்றோ இல்லை ஈழத்துக்காக பாடு படாதவர் என்றோ கூறிவிட முடியாது.இன்றைய காலகட்டத்தில் வை கோவின் ஆதரவு எமது ஈழ போராட்டத்திற்கு தேவை என்பதில் எந்த மாற்று கருத்தும் கிடையாது. ஆனாலும் எமது ஈழ போராட்டத்தை வைத்து தமக்கு அரசியல் இலாபம் தேடாத எந்த ஒரு தமிழ் தலைவர்களும் இல்லை என்பதினையும் நாம் ஏற்றுகொள்ள வேண்டியவர்களாகின்றோம்.

இப்போதுள்ள காலகட்டத்தில் அடுத்து எமது நினைவில் வரும் இந்திய தமிழ் தலைவர் சீமான். உணர்ச்சி மிக்க பேச்சாற்றலும் சினிமா பாணியிலான வசன அமைப்புக்களுமே இவரது வெற்றியின் முக்கிய அம்சமாக கூற முடியும். ஆனாலும்  இவர் பக்கம் இப்போதுள்ள இளம் தலைமுறை நிற்பதும் அரசியல் ரீதியான ஒரு படி வெற்றி என்று சொல்ல முடியுமே தவிர இவர்கள் மட்டுமே எமது ஈழ விடிவின் அச்சாணிகள் என்று கூறி விட முடியாது. ஆனாலும் இவர்களின் வீராவேச பேச்சு எமது அரசியல் ரீதியான காய் நகர்த்தலுக்கு தேவை என்பதினை ஏற்று கொள்ள வேண்டியவர்களாகின்றோம்.

அது போக எமது தமிழ் தலைவர்கள் திருமா,பழநெடுமாறன், தமிழருவி, வேல்முருகன்,ராமதாஸ் என எல்லோரையும் அரவணைக்க வேண்டியவர்களாக உள்ளோம் என்பதே உண்மையான நிலைபாடாகும்.
ஆகவே எமது அரசியல் செயற்பாடுகளுக்கு எல்லா தமிழ் தலைவர்களும் தேவை என்பதே இன்றைய காலத்தின் கட்டாயம். அது தவிர நாம் எந்த ஒரு தமிழ் அரசியல் தலைவர்களையும் உயர்த்தியோ தாழ்த்தியோ பார்க்கப்போவதில்லை. எனவே தமிழ் ஊடகங்கள் ஒரு தலைவருக்கு சார்பாகவும் இன்னொரு தமிழ் தலைவருக்கு எதிராகவும் எழுதுவதனை நிறுத்தி கொள்ளுங்கள். எமது போராட்டத்தில் உண்மையான அக்கறையான ஊடகங்களாக இருந்தால் நடுவு நிலையான கருத்துக்களையும்  தூர நோக்கிலான சிந்தனையுள்ள ஆக்கங்களையும் வெளியிடுங்கள். அன்றைய பொழுதில் உமது செய்தி பிரபலமாக இருக்க வேண்டும் என்பதற்காக ஒரு விடுதலை போராட்டத்தின் மீதும் ஒருலட்சம் மக்களின் உயிர்களின் மீதும் நாற்பத்தி ஐந்து ஆயிரம் மாவீரர்களின் கனவின் மீதும் ஏறி நின்று பிரபலமாக நினைக்காதீர்கள்.

இறுதியாக எமது போராட்டம் இன்னும் ஆக்ரோஷமாகவும் முழுவதுமான வீரித்துடனும் மீண்டும் தோற்றம் பெறும் என்பதில் எந்த ஒரு ஐயப்பாடும் இல்லை.ஆனால் அந்த விடுதலை தோற்றமானது எமது உண்மையான விடுதலைவேட்கையிலும் தாகத்திலும் தான் தங்கியுள்ளது.

மதிப்புக்குரிய இளம் சமுதாயமே எமது நாட்டுக்காகவும் எமது விடுதலைக்காகவும் நாம் போராட வேண்டும். எமது தலைவன் காட்டிய வழி எமக்கு தெரியும். அந்த பாதையை நாம் கடந்து முடிக்க வேண்டிய தேவையில் உள்ளோம்.ஆகவே எமது போராட்டத்தை வென்று எடுக்க இப்போதே கைகொடுப்போம் .
தமிழரின் தாகம் தமிழ் ஈழ தாயகம்

பேஸ் புக்கில் உங்கள் விருப்பத்தை தெரிவித்து எங்களுடன் இணைந்து கொள்ளுங்கள் உறவுகளே.