Love

ஒற்ற கல்லில் குந்த வச்சு
ஓரத்தில் பீப்பா வச்சு
வெள்ளி சட்டி தண்ணி வச்சு
வெண்மதியில் என்னை வச்சு
கூனு விழுந்த பின்னாலும்
குளிப்பாட்ட வந்த மச்சான்
ஓரத்தில குட்டி பசங்க
ஒளிஞ்சுகிட்டு சிரிக்கிறாங்க

மஞ்சள் பூவை போன்றவளே
மாமன் மனசில் வாழ்பவளே
என் வாழ்வின் தேவதையே
எல்லாமாக வந்தவளே
குஞ்சு குருமன் சிரிச்சா என்ன
கூதல் காத்து அடிச்சா என்ன
உன்னை விட்டு நானும் போக
உள்ளம் கொஞ்சமும் ஏவலையே

காலும் கொஞ்சம் நோவுதுங்க
கையும் கொஞ்சம் வலிக்குதுங்க
நேற்று செய்த கறி சோறு
உங்களுக்கு மட்டும் போதுமுங்க
நீங்க விட்ட மீதி உண்ண
பாவி மனசும் ஏங்குதுங்க
பச்சை அரிசி கஞ்சியுங்க
ராத்திரிக்கு போதுமாங்க

உந்தன் கையால் சாப்பிட்டா
எல்லாமே அமிர்தம் தானே
ஒற்றை பார்வை பார்த்தாலே
பசியும் மறப்பேன் உன்னாலே
தாயை போல காப்பவளே
என் தாரம் என்று வந்தவளே
வாழும் வாழ்வின் அர்த்தத்தை
வானவில்லாய் வரைந்தவளே

என்ன சொன்னாலும் ரசிக்கும் மச்சான்
பூவை போல தாங்கும் மச்சான்
உன்னை விட்டு போவேனா
நீ என்னை விட்டு போவாயா
காலன் நம்மை நெருக்கும் போதும்
கையை கோர்த்தே போவோமா
காற்றாய் நாமும் கலப்போமா
காதல் தீவில் மிதப்போமா

Edit